Əlfəcin

Bizə lazım olan ləvazimatlar: İstifadəyə yararsız kətan və pambıq parça hissələri, istifadəyə yararsız müxtəlif ölçülü iplər,  qayçı, iynə, rəngli qələmlər.  

Seçilmiş parça hissəsinin üzərinə rəngli qələmlərlə müxtəlif motivlər çəkilir. Mən ekoloq olaraq əsasən təbiət motivlərinə üstünlük verirəm. 

Bu mərhələdə motivlərin üzərini rəngli iplərlə müxtəlif tikmə növlərindən istifadə edərək tikirik. Mən əsasən saya və sanama tikmə növlərindən istifadə edirəm. 

Müxtəlif rəngli lazımsız iplərdən əlfəcinimizin motivlərinin rənginə uyğun olaraq hörüklər hazırlayırıq.

Hazırladığımız hörüyü əlfəcinin arxa hissəsinə yuxarıdan iynə sap ilə bərkidirik. Və əl əməyi, göz nuru olan rəngarəng əlfəcinlərimiz hazırdır. Beləliklə lazımsız parça və saplarımız bir gözəlliyə çevrilərək sevimli kitablarımızın arasında yaşayacaq. Bu əlfəcinləri satış məqsədi ilə də hazırlaya bilərsiz. Eyni zamanda ölkədən kənarda yaşayan əzizlərinizə, həkim, müəllim, hərbçi, polis, idmançı, dənizçi və s. peşə sahiblərinə, tələbə övladınıza, təqaüdçü valideynlərinizə hədiyyə edərək onların daim sizi xatırlamasına, həmişə yanlarında olduğunuzu hiss etməyə səbəb ola bilərsiz.Bununla da o lazımsız parça hissələrindən hazırlanmış əl işlərinə mənəvi anlam qatmış olarsız. Eyni zamanda qədim tikmə sənətimizin əldən-ələ keçərək yaşamasına vasitə  olarıq.