Dreamhouse

Gördüyünüz bu təvazökar evciyi hazırlamaq üçün öz evimizdə kardon qutu saxlamırıq :D Hətta lazım olsa, gedib qonşudan da boş qutuları yığırıq. Kardonun mümkün qədər qalın və bərk olmasına diqqət etməliyik, çünki biz hər zaman, hər işin mükəmməlini görməyin tərəfdarıyıq :)

Bunun üçün ilk öncə kardonu şəkillərdə göstərdiyim ölçülərdə kəsirik, növbə ilə 30x30 ölçüdə kəsdiyim altlığa əvvəl evin kənar hissələrini, daha sonra damını birləşdiririk. Sobamızı da qurduqmu? Gəlin indi də evimizin 3-cü mərtəbəsinə balaca bir pəncərə qoyaq.

Bu rəsmi adını bilmədiyim “megapəncərə”ni hazırlamaq üçün kardondan, pərdəsi üçün isə salfet, köhnə oyuncağımdan sökdüyüm parça və mirvari iplikdən istifadə etdim.

Maketimizin müəyyən hissələrində uyğun ölçülərdə qapı və pəncərələr üçün kəsiklər açırıq. Parçaları atmayın, lazım olacaq. Həmçinin, şəffaf plastik materialdan olan köhnə faylımın üz qabığı hissəsini və bəzi qutuları topladım, bunları pəncərələrin şüşəsi kimi istifadə edəcəyik.

Kardon və əvvəl topladığımız plastik vərəqlə terasımızı düzəldirik. Bir neçə mərhələdən sonra bura yenidən geri dönəcəyik. Evin arxa hissəsinə də kardon əlavə edərək genişlədirik.

Yenə kardon, salfet, parça, mirvari iplik və plastik vərəqdən istifadə edərək pəncərələrimizi hazırlayıb maketə birləşdiririk.

Kardon, yanmış kibrit çöpləri və taxta çubuqlardan istifadə edərək evimizin məhəccərini hazırlayırıq.

Yenə kardondan istifadə edərək evin divarlarını bəzəyirik, künclərini də örtürük ki səliqəli görünsün.

Kardonu kiçik hissələrə bölüb kleylə bir-bir dama birləşdiririk. Təkcə bu mərhələ 2 günümü alsa da əziyyətə dəydi məncə :)

Yumurta qutusunu kiçik hissələrə bölüb PVA kleylə yoğuraraq çox az paper clay (kağız xəmiri/gipsi) hazırladım. Bunu dairəvi pəncərələrin kənarlarını örtmək üçün istifadə edirik.

Əvvəl kəsdiyimiz qapı hissələrini istifadə edəcəyik, mən ilk öncə onları A4 kağıza bükdüm, üzərinə qələmlə qapı cizgiləri çəkdim və muncuqdan dəstəyini hazırladım. Nəticə yaxşı görünür, onları maketə birləşdirə bilərik :)

Bu gördüyünüz materialdan ayaqqabı qutularında yeni alınan ayaqqabılar zədələnməsin deyə istifadə olunur, mən isə onu maketimin xalçası kimi işlədəcəm :dd

Evimizi zövqə uyğun boyayırıq. Diqqətli olun, xalçalara dəyməsin :d

Miniatür evimiz üçün miniatür dekorlar hazırlayırıq. Bu addımda bütün işi öz fantaziyamıza buraxırıq. Real həyatda belə dekorlar yoxdur, bunu etməyək deməyin. Məsələn mən cəviz qabığından asılqan, telefon qapından masa və s. digər əşyalardan miniatür dekorlar hazırladım :) Terasda işimiz bitdikdən sora plastik vərəqlə açıq hissəni bağlayırıq.

İlk öncə anamın güllərinin qurumuş budaqlarını maketə yapışdırdım, daha sonra yarpaqları hazırlamaq üçün polistirol adlanan materialı kiçik hissələrə bölüb PVA kley və yaşıl boya ilə qarışdırdım. Eyni prosesi çiçəkləri hazırlamaq üçün çəhrayı rənglə də edək. İndi isə hazır yarpaq və çiçəklərimizi kley ilə budaqlara yapışdıra bilərik.

Son olaraq şəkildəki kəməri (artıq ipləri köhnəldiyinə görə maket üçün istifadə etsəm daha faydalı olar deyə düşündüm) balkonun kənar hissəsinə yapışdırıram. Və budur, nəhayət ki evimiz hazırdır!

Qeyd: Bütün oyuncaqlarım Göbələk evdə yaşadığı üçün bu evə sakin tapmadım :D

Hər kəsə uğurlar!

#letthecardboardlive :)